Персиските теписи претставуваат синоним за квалитет и трајност, но само правилната нега и одржување ќе им овозможи долг век и убавина. Еве неколку совети за нивно одржување:

Заштитете го од молците - персиските теписи се изработуваат од волна, материјал кој претставува храна за молците. Ларвата на молците може да се смести во внатрешноста и до 10 cm од работ на тепихот, а најчесто тоа се случува од долната страна каде што не е вознемирувана од никого. Затоа тепихот од време навреме треба да се проверува од долната страна, со цел да се забележи било каква активност на молците.

Спречете директна изложеност на сончево зрачење - персискиот тепих не смее да биде изложен на силно сонце за да се спречи избледување на неговите бои. Притоа, прозорецот не претставува соодветна заштита бидејќи стандардното стакло не го сопира UV зрачењето. За таа цел на прозорците треба да се постави завеса или друг вид на засенување, а може и специјална фолија која врши филтрирање на UV зраците.

Не треба да биде изложен на прекумерна влага – преголемата влажност во просторијата, како природната, така и онаа која потекнува од овлажувачите и клима-уредите, може да влијае негативно на структурата и бојата на тепихот.

Повремено направете ротација - променете ја поставеноста на тепихот на секои
6 - 12 месеци со цел да се избегне понагласено абење на места во просторијата каде што има пофреквентно движење и активности.

Подалеку од домашните миленичиња - домашните миленичиња може да го оштетат тепихот со жвакање на краевите на тепихот, кинење со канџите, како и со вршење на нужда.

Чистење на тепихот – Најдобро е чистењето да се врши редовно, со сува метличка или со тресење. Грубите четки треба се избегнуваат. За чистење може да се употребува и правосмукалка која е со слаба моќност или која при правосмукањето е подесена на најслаба јачина. Најдобро е правосмукањето да се изведува во правец на протегање на влакното на килимот. Не употребувајте средства за хемиско чистење или за отстранување на дамки, како и уреди за чистење на пареа.

Перење на тепихот - Персискиот тепих треба да се пере само кога навистина има потреба за тоа, а перењето не смее да биде длабинско. Персискиот тепих не смее да се пере во машина и да се пегла.

Треба да се употребуваат благи раствори на специјализирани средства за перење на природно боени волнени или свилени ткаенини. Средствата не треба да содржат хлор, амонијак, избелувач, омекнувач или силикон, а најдобро е кога се од растително потекло. По перењето тепихот не смее да биде оставен влажен за подолго време бидејќи постои можност за појава на мувла, која ќе предизвика трајни оштетувања. Не треба да се суши на радијатор, печка или греалка, туку треба да биде оставен на свеж воздух.