За да се задржи квалитетот и да се продолжи векот на мебелот од трска, бамбус или ратан, треба соодветно да се чисти и одржува.

За добар изглед на мебелот тој треба редовно да се чисти од прашина, што ќе спречи оштетување на неговата површина. Доколку сте истуриле течност, најдобро е што поскоро да се исчисти за да не се појави дамка.

Материјалите кај овој мебел потекнуваат од поднебје со висока влажност на воздухот, па затоа пребришувајте го со мека мокра крпа, на која сте додале неколку капки лимон. Сепак, треба да се знае дека овој мебел не е водоотпорен, па затоа не треба да се остава на дожд.

Исушениот мебел е поподложен на кршење, па затоа ако површината е многу исушена, што е чест случај доколку мебелот е надвор, прекријте го мебелот со влажни пешкири и оставете го преку ноќ за да добро впие влага.

Многу извалканите и тешко достапни места на плетениот мебел истријте ги со мека четка за заби или сунѓер потопен во благ раствор на сапуница, исперете ги со чиста вода и оставете го да се исуши мебелот, но не на директно сонце. Не употребувајте абразивни средства за чистење кои може да ја оштетат неговата површина.

Измиениот мебел треба добро да се исуши за што може да се потребни и неколку денови. Додека не се исуши целосно не треба да се седи на него бидејќи влажниот мебел е омекнат и може да дојде до трајни деформации и оштетувања.

Евентуалните пукнатини на мебелот може да се затворат со внесување на пчелин восок, кој се внесува со помош на загреано перо.