Мало невнимание при лепењето може да доведе лепакот да се појави на несакано место, како на пример тепихот, тапацирот од мебелот или некоја друга ткаенина, и да направи дамка. Во овој случај, еве неколку совети како таа да се отстрани.

Најлесно може да се отстранат дамките од лепилата кои се направени на водена база, со кои се лепи хартија. Пред да се исуши лепакот, со лажица или со тапата страна на ножот внимателно истугајте што е можно повеќе лепак. Поголем дел од дамката ќе се отстрани ако ткаенината ја исперете со големо количество чиста вода. Постапката треба да се повтори додека целосно не исчезне.

Доколку чистењето со обична вода не е успешно, во дамката втријте петролеј и тријте додека не исчезне дамката. Подоцна петролејот ќе го отстраните со помош на детергент за миење садови – истријте го местото на дамката, исперете со топла вода, а на крај ткаенината исперете ја со најтопла вода која истата може да ја поднесе без да се оштети.

Дамките од лепак може да се отстранат и ако ткаенината добро ја потопите со оцет, а потоа ја триете со чиста крпа која сте ја натопиле со вода.

На предметите од стакло или пластика, дамките од лепак од налепниците може да ги извадите доколку остатоците од лепак ги премачкате со масло за јадење, а потоа местото го исперете на вообичаениот начин. За да не се појават овие дамки воопшто, налепниците може да ги извадите доколку го потопите предметот во топла вода и го држите додека не се извади налепницата.



Доколку лепакот се истури на паркетот, отстранете што е можно повеќе лепак. Остатокот треба да се отстрани со чист бензин – со четка за заби која е натопена со бензинот тријте го местото, а потоа пребришете со крпа натопена во вода и добро осушете го. Дамката може да се отстрани и со ацетон, но тој може да го оштети лакот, па затоа прво пробајте на некое помалку видливо место како делува ацетонот.

Доколку капнете супер лепак на некоја ткаенина, прво почекајте лепакот да се исуши. Извалканото место натапкајте го со ткаенина натопена со ацетон, почекајте минута до две, а потоа со лажица отстранувајте го омекнатиот лепак. Доколку е потребно постапката повторете ја, и тоа и од лицето и од опачината на ткаенината. Притоа, пред да започнете, исто така проверете како ткаенината реагира на ацетонот.