Се За Домот | Модерни радијатори за поубав амбиент

Модерни радијатори за поубав амбиент

Радијаторите, некогашното нужно зло во уредувањето на домот – денес со современиот дизајн и опременост може да се вклопат во секој ѕид и да се во склад со ентериерот

Радијаторот со цветен орнамент претставува фокусна точка во просторот

Инспирирано од структурата на ДНК

При уредувањето на домот често се случува да биде променет целокупниот мебел, боите, да бидат купени нови теписи и завеси, а дури на крај да се забележи дека старите радијатори не се вклопуваат во сликата на новиот амбиент. Исто така, многумина не знаат дека, од технички аспект, старите радијатори трошат повеќе енергија и дека им е потребно подолго време да се загреат.

Денес, покрај практичната примена, радијаторите добиваат и естетска функција. Новите форми на радијатори овозможуваат нивно вклопување во најразлични стилови на внатрешното уредување. Радијаторите може да претставуваат декорации слични на скулптури, можат да бидат во форма на комода, преграда, сушилник за пешкири, метална конструкција која потсеќа на цвеќе во саксија или некој друг естетски детаљ во просторот.

Радијатори во боја

Белата боја повеќе не е задолжителна, па радијаторите може да бидат изработени во било која друга боја или да се во иноксна изведба. Секако, боењето може да го направите и сами. Притоа, бојата на радијаторот треба да биде во склад со доминантната боја на просторот. Радијаторот може да биде обоен целосно или само делумно.

На радијаторот е поставено огледало и закачалка,
а традиционалната бела боја е заменета со црвена

Во бањата

Заштеда на просторот во бањата се постигнува со поставување на “скалести” радијатори на кои се закачуваат и сушат пешкири или со поставување на радијатор кој од предната страна е обложен со огледало. Ваков радијатор исто така е практичен и во претсобјето.

Модерен скалест радијатор во бањата

Маскирање на радијаторот

Погледот на постарите, оштетени и типски радијатори го расипува впечатокот во просторот, но затоа маските на радијаторите кои ги има во различни материјали, бои и форми можат да го решат овој проблем. Се разбира, најважно правило при скривање на радијаторот е да се остави доволно слободен простор за проток на топлиот воздух.

Нај често станува збор за таканаречените ормар–облоги, кои всушност се тесни елементи во форма на ормар, поставени пред радијаторот, чија предна страна е перфорирана заради непречен проток на топлиот воздух. Слична варијанта се и маските за радијатор кои се поставуваат кај радијаторите кои се поставени под прозорец, кои можат да бидат изведени како продолжување на даската кај прозорецот.

Маската на радијаторот ја има улогата на полица за саксии

Во спалната и детската соба, на радијаторот може да се постави полица која ќе служи како дополнителен простор за поставување на предмети. Кај пониските радијатори може да се постават цврсти дрвени рамки и на тој начин да се добие дополнителен простор за седење. На горната површина може да се постават украсни перничиња или да се истапацира целата должина. Похрабрите и покреативните може да ја разгледаат опцијата околу радијаторот на ѕидот да се наслика камин.

на почеток