Во врелите летни денови, како замена за тешките завеси, може да поставите нови прозрачни завеси. За светкање и нежно ѕвечкање на стакленцата на ветрот или пријатно тропкање на дрвото потрудете се сами.

Прекршувањето на светлоста и менувањето на бојата на монистата, играта на сонцето и светлината ќе му дадат на вашиот простор неодолива доза на романтика и летно задоволство. Најдобро е да се употребува мониста која е веќе продупчена, со што ќе се намали времето на изработка, а може да се употребат и школки или некој материјал кој ви се допаѓа.

Ќе ја објасниме постапката на изработка на прозрачна завеса со дрвени кругови, која е слична, но покомплексна од постапките кога се употребува мониста, школки и сл.


Потребно е:

• Неколку гранки (бреза)
• Најлонски конец
• Рачна пиличка или клешта за дрво
• Дупчалка
•Дрвена летвичка со широчина на рамка од врата или прозорец
• Кукичка за закачување

Набавете неколку гранки од бреза со средна дебелина.

Со пила или со клешта за дрво изрежете ги круговите.

Секој круг придржувајте го на тврда подлога за да со дупчалката издупчите отвори од двете страни под нормален агол на круговите (круговите не смеат да бидат претенки за да не пукнат кога бургијата ќе помине низ нив).

Исечете го конецот на саканата висина и провлечете го низ круговите. Пред или после круговите направете мал јазол за да го фиксирате кругот.

Круговите пред да ги поставите може и да ги обоите со некоја весела боја или во повеќе бои, иако и природни изгледаат многу убаво.


Монтажа:

На летвата која сте ја скроиле според ширината на прагот на вратата издупчете онолку отвори колку што имате предвидено најлонски конци. Веќе претходно нанижани, протнете ги низ тие отвори и на врвот цврсто заврзете ги. Густината на завесата е определена со бројот на најлонските конци.

На средината монтирајте кукичка за закачување и закачете ја од надворешната страна на прагот.