Машко-женските односи, ставови и размислувања многу често се различни, а субјективноста, која секој поединец ја носи во себе, дополнително може да го отежне разбирањето помеѓу спротивните полови.

Сферите на неразбирање и различни потреби се присутни во сите животни подрачја, па поради тоа и се развиваат различни козметички, модни, спортски и останати видови на производи. Сепак проблемите започнуваат во сферите кои вклучуваат заеднички живот, а една од нив е секако и уредувањето на идниот дом. Иако проблемите се решливи со компромиси, за конечно ускладување на ставовите потребно е да се вложи време и труд, бидејќи уредувањето на домот од женска и машка перспектива се разликува.

Присутност на детали во женското уредување

Особености на половите

Жените често истовремено извршуваат различни функции – мајка, сопруга, деловна жена, домаќинка и како такви имаат широки согледувања во она што се случува околу нив. Покрај тоа, тие се сензибилни и пред се го сакаат убавото. Обично ги забележуваат деталите кои кај многумина припадници на машкиот пол не би предизвикале интерес. Домот за нив има посебна вредност бидејќи претставува место на собирање и соживот на сите членови на семејството.

Мажите најчесто се предадени на работата која ја работат, бидејќи добро завршена работа значи и средства потребни за егзистенција на семејството. Деловните успеси ќе ги покажат преку купување на скапоцен автомобил, чести патувања, изградба на голема куќа и сл. Мажите во своите размислувања се поглобални од жените и најчесто не сакаат да се оптоваруваат со детали.

Опишаните особености на двата пола редовно се пренесуваат и во одлуките кои се однесуваат на уредување на станбениот простор. Со своето чувство за детали жените се често во судир со машкото глобалистичко размислување. Фактот за различноста на сензибилитетите кај двата пола им е познат на повеќето мажи, па затоа некои од нив веднаш ќе и ги препуштат сите одлуки за уредувањето на својата партнерка или ќе ангажираат експерт за уредување од женски пол.


Женско и машко уредување

Уредувањето на домот од женска перспектива може да се опише на следниот начин:

• Со оглед на фактот дека домот е место за извршување на различни активности, на жените им е особено важно да бидат задоволени функционалните барања, кои ќе овозможат полесно и побрзо извршување на работните процеси.

• Функционалноста мора да биде поврзана со естетиката за да се добие посакуваниот ефект.

• Присутноста на деталите, кои го создаваат идентитетот на просторот, е составен дел од креирањето на посакуваниот амбиент во домот.

Женската палета на бои е пожива од машката

• Смелото впуштање во игра со боите на ѕидот, елементите на мебелот, декоративните ткаенини, како и нивната присутност во деталите има за цел да се истакне префинетиот вкус и чувство за убавина.

• Фините материјали, мекоста на линиите на мебелот, кои често се изразуваат со избор на заоблени форми, се израз на женската чувствителност и нежност.


Машките критериуми за избор на елементите во просторот се разликуваат од женските:

• Функционалноста им е потребна во просторот каде тие ги извршуваат конкретните работи – на пример, работната соба мора да биде доволно пространа и осветлена, а и опремена.

• Изборот на технички уреди како што се ТВ уреди, аудио системи или опрема со интелигентен систем на управување кај нив привлекува поголемо внимание отколку изборот на парчиња мебел. Впрочем, тие им се најмили детали во просторот.

Техничките уреди за мажите се најмили детали во домот

• При изборот на бои се повнимателни и палетата им е поскромна од женската палета, а омилени им се студените бои.

• Главен критериум при избор на гарнитурите за седење и столиците е удобноста, е не визуелниот впечаток.

• Минимализмот, со силен акцент на чиста геометрија, за која се карактеристични полигонални облици без заоблувања, претставува типичен машки избор.

Минимализмот е типичен машки избор

Доколку се земат предвид искажаните различности, единствен правилен избор е компромисот. Кој колку ќе успее да го наметне својот став зависи од аргументите кои ќе бидат предочени, но и од шармот со кој ќе се омекне спротивната страна.