Се За Домот | Како максимално да се искористи просторот

Како максимално да се искористи просторот

Потребата за уредување на стан со површина 40-50 м² за четворочлено семејство е сè почеста. Со правилна организација на основните функционални групи можно е да се задоволат потребите на овие семејства, но притоа важно е вкупниот естетски впечаток да биде што подобар.

Сл1. Првобитна состојба на станот

И членовите на семејството и пријателите многу подобро ќе се чувствуваат во просторот кој и покрај малата површина, сепак е пријатен за престој. За да се постигне ова меѓу најзначајните предуслови спаѓаат соодветен распоред на мебелот, соодветни бои, осветлување, како и присуство на зеленило во просторот.

Во дадениот случај, просторот во кујната е доволен за да се овозможи потребната фунционалност, а дополнителна комоција ќе се постигне со поставување на шанк со кој ќе се зголеми работниот простор. За да просторот ја задржи поврзаноста на кујната со дневната соба, освен шанкот се поставува и трпезариска маса веднаш до кујната. На тој начин врската со кујната преку пултот ќе биде оптимална, а ќе се создаде и дополнителен простор во дневната за сместување на мебелот.

Сл.2 Нова состојба на станот

Во дневната соба се поставува тросед на извлекување и двосед, а трпезариската и клуб масата се од стакло, со што ќе се зголеми транспарентноста во просторот.

Покрај вратата која води во детската соба сместени се два плакари, над кои се сместени хоризонтални елементи, со што просторот максимално се искористува. Хоризонталните полици изведени се во бела боја за да се добие впечаток на “лебдење“ на просторот. Елементите на спротивната страна се изведени во две различни висини, односно со измена на полни и стаклени зони за да визуелно се намали бројот на елементи во просторот, што кај помали простори е особено важно. Во детската соба сместени се кревети на кат, плакари и две работни маси над кои природното светло доаѓа од лева страна.

на почеток