Балконите дури и кога имаат многу мали димензии, може да бидат пријатно место за престој во летните вечери или утра.

За почеток, треба да се исфрлат сите одвишни предмети, како канта за ѓубре, жици за алишта и слично, со што ќе се ослободи простор, а и визуелно балконот ќе добие на големина.

Плочките може да бидат пастелни или во боја на ѕидовите, а преку нив може да се стави убава простирка. Доколку подот е бетонски, може да се постави линолеум во боја на ѕидовите, или пак дрвена подлога која ќе даде природен изглед.

За визуелно зголемување на просторот, бојата на гелендерите може да биде во склад со подот или ѕидовите.

Цвеќето може да биде во помали саксии, а доколку е поставено на метална конструкција, ќе се добие дополнителен простор на подот. Саксиите може да бидат поставени и висечки, во аголот од балконот.

За мебелот, идеално е кога е изработен од лесен материјал, ратан или пластика, и кога има мали димензии. Може да се постави мала клупа во Г облик до ѕидот и мала масичка до ѕидот или ограда, а на ѕидовите може да има мали полици на кои ќе ги ставите шолјите за кафе и декорации.

Осветлувањето поставете го над клупата и на таванот, а на полиците може да ставите свеќи кои ќе внесат романтика, а истовремено и ќе ги растеруваат комарците.

  на почеток