Калата потекнува од Африка каде расте слободно на влажни подрачја и мочуришта, а кај нас најмногу се одгледува како режено цвеќе. Може да се одгледува и во саксии како собно растение, но успева и на отворен простор. Во зависност од видот може да порасне до 1,5 m во височина, со крупни цветови и да се одгледува како режено цвеќе, додека видовите кои се одгледуваат во домот се пониски и со поситни цветови.
Цветовите на калата се жолти и многу ситни, собрани во клас, со бел лист свиткан како инка кој има улога да ги привлече инсектите за опрашување на цветот. Од неодамна постојат и видови со жолт или виолетов заштитен лист. Поставете ја на светло место, заштитено од силното летно сонце. Може да ја изнесете и на отворено, но внимавајте на ниските температури и провевот.
Садењето на кртолите е во август и септември, најдобро во саксии 12-14 cm. Цветањето ќе почне во октомври, а најголем интензитет ќе постигне во рана пролет. Земјата треба да биде збогатена со хумус и ѓубриво, но може да користите и мешавина од градинарска земја и тресет.
Полевајте ја редовно и обилно бидејќи има многу потреба од вода. Престанете да ја полевате во периодот на мирување, откако ќе заврши фазата на цветање (кон крајот на април и почетокот на мај). Прихранувајте ја на секои две седмици со ѓубриво богато со азот кое ќе овозможи буен раст и голем цвет.
Размножувањето е најчесто со одделување на младите кртоли. Кртолите може и да се пресечат по што следи дезинфекција со фунгицид и јаглена прашина. Се оставаат да се исушат, па се садат.